kiṁ kāraṇaṁ brahma kutaḥ sma jātā
jīvāma kena kva ca sampratiṣṭhā ।
adhiṣṭhitāḥ kena sukhetareṣu
vartāmahe brahmavido vyavasthām ॥ 1 ॥
kālaḥ svabhāvo niyatiryadṛcchā
bhūtāni yoniḥ puruṣa iti cintyā ।
saṁyoga eṣāṁ na tvātmabhāvā -
dātmāpyanīśaḥ sukhaduḥkhahetoḥ ॥ 2 ॥
te dhyānayogānugatā apaśyan
devātmaśaktiṁ svaguṇairnigūḍhām ।
yaḥ kāraṇāni nikhilāni tāni
kālātmayuktānyadhitiṣṭhatyekaḥ ॥ 3 ॥
tamekanemiṁ trivṛtaṁ ṣoḍaśāntaṁ
śatārdhāraṁ viṁśatipratyarābhiḥ ।
aṣṭakaiḥ ṣaḍbhirviśvarūpaikapāśaṁ
trimārgabhedaṁ dvinimittaikamoham ॥ 4 ॥
pañcasrotombuṁ pañcayonyugravakrāṁ
pañcaprāṇormiṁ pañcabuddhyādimūlām ।
pañcāvartāṁ pañcaduḥkhaughavegāṁ
pañcāśadbhedāṁ pañcaparvāmadhīmaḥ ॥ 5 ॥
sarvājīve sarvasaṁsthe bṛhante
asmin haṁso bhrāmyate brahmacakre ।
pṛthagātmānaṁ preritāraṁ ca matvā
juṣṭastatastenāmṛtatvameti ॥ 6 ॥
udgītametatparamaṁ tu brahma
tasmiṁstrayaṁ supratiṣṭhā'kṣaraṁ ca ।
atrāntaraṁ brahmavido viditvā
līnā brahmaṇi tatparā yonimuktāḥ ॥ 7 ॥
saṁyuktametat kṣaramakṣaraṁ ca
vyaktāvyaktaṁ bharate viśvamīśaḥ ।
anīśaścātmā badhyate bhoktṛ -
bhāvāj jñātvā devaṁ mucyate sarvapāśaiḥ ॥ 8 ॥
jñājñau dvāvajāvīśanīśāvajā
hyekā bhoktṛbhogyārthayuktā ।
anantaścātmā viśvarūpo hyakartā
trayaṁ yadā vindate brahmametat ॥ 9 ॥
kṣaraṁ pradhānamamṛtākṣaraṁ haraḥ
kṣarātmānāvīśate deva ekaḥ ।
tasyābhidhyānādyojanāttattva -
bhāvāt bhūyaścānte viśvamāyānivṛttiḥ ॥ 10 ॥
jñātvā devaṁ sarvapāśāpahāniḥ
kṣīṇaiḥ valeśerjanmamṛtyuprahāṇiḥ ।
tasyābhidhyānāttṛtīyaṁ dehabhede
viśvaiśvaryaṁ kevala āptakāmaḥ ॥ 11 ॥
etajjñeyaṁ nityamevātmasaṁsthaṁ
nātaḥ paraṁ veditavyaṁ hi kiñcit ।
bhoktā bhogyaṁ preritāraṁ ca matvā
sarvaṁ proktaṁ trividhaṁ brahmametat ॥ 12 ॥
vahneryathā yonigatasya mūrtinar
dṛśyate naiva ca liṅganāśaḥ ।
sa bhūya evendhanayonigṛhya -
stadvobhayaṁ vai praṇavena dehe ॥ 13 ॥
svadehamaraṇiṁ kṛtvā praṇavaṁ cottarāraṇim ।
dhyānanirmathanābhyāsādevaṁ paśyannigūḍhavat ॥ 14 ॥
tileṣu tailaṁ dadhinīva sarpi -
rāpaḥ srotaḥsvaraṇīṣu cāgniḥ ।
evamātmā'tmani gṛhyate'sau
satyenainaṁ tapasāyo'nupaśyati ॥ 15 ॥
sarvavyāpinamātmānaṁ kṣīre sarpirivārpitam ।
ātmavidyātapomūlaṁ tadbrahmopaniṣat param ॥ 16 ॥
yuñjānaḥ prathamaṁ manastattvāya savitā dhiyaḥ ।
agnerjyotirnicāyya pṛthivyā adhyābharat ॥ 1 ॥
yuktena manasā vayaṁ devasya savituḥ save ।
suvargeyāya śaktyā ॥ 2 ॥
yuktvāya manasā devān suvaryato dhiyā divam ।
bṛhajjyotiḥ kariṣyataḥ savitā prasuvāti tān ॥ 3 ॥
yuñjate mana uta yuñjate dhiyo
viprā viprasya bṛhato vipaścitaḥ ।
vi hotrā dadhe vayunāvideka
inmahī devasya savituḥ pariṣṭutiḥ ॥ 4 ॥
yuje vāṁ brahma pūrvyaṁ namobhirviśloka
etu pathyeva sūreḥ ।
śṛṇvantu viśve amṛtasya putrā ā ye
dhāmāni divyāni tasthuḥ ॥ 5 ॥
agniryatrābhimathyate vāyuryatrādhirudhyate ।
somo yatrātiricyate tatra sañjāyate manaḥ ॥ 6 ॥
savitrā prasavena juṣeta brahma pūrvyam ।
yatra yoniṁ kṛṇavase na hi te pūrtamakṣipat ॥ 7 ॥
trirunnataṁ sthāpya samaṁ śarīraṁ
hṛdīndriyāṇi manasā sanniveśya ।
brahmoḍupena pratareta vidvān
srotāṁsi sarvāṇi bhayānakāni ॥ 8 ॥
prāṇān prapīḍyeha saṁyuktaceṣṭaḥ
kṣīṇe prāṇe nāsikayocchvasīta ।
duṣṭāśvayuktamiva vāhamenaṁ
vidvān mano dhārayetāpramattaḥ ॥ 9 ॥
same śucau śarkarāvahnivālikā -
vivarjite śabdajalāśrayādibhiḥ ।
manonukūle na tu cakṣupīḍane
guhānivātāśrayaṇe prayojayet ॥ 10 ॥
nīhāradhūmārkānilānalānāṁ
khadyotavidyutsphaṭikaśaśīnām ।
etāni rūpāṇi puraḥsarāṇi
brahmaṇyabhivyaktikarāṇi yoge ॥ 11 ॥
pṛthivyaptejo'nilakhe samutthite
pañcātmake yogaguṇe pravṛtte ।
na tasya rogo na jarā na mṛtyuḥ
prāptasya yogāgnimayaṁ śarīram ॥ 12 ॥
laghutvamārogyamalolupatvaṁ
varṇaprasādaḥ svarasauṣṭhavaṁ ca ।
gandhaḥ śubho mūtrapurīṣamalpaṁ
yogapravṛttiṁ prathamāṁ vadanti ॥ 13 ॥
yathaiva bimbaṁ mṛdayopaliptaṁ
tejomayaṁ bhrājate tat sudhāntam ।
tadvā''tmatattvaṁ prasamīkṣya dehī
ekaḥ kṛtārtho bhavate vītaśokaḥ ॥ 14 ॥
yadātmatattvena tu brahmatattvaṁ
dīpopameneha yuktaḥ prapaśyet ।
ajaṁ dhruvaṁ sarvatattvairviśuddhaṁ
jñātvā devaṁ mucyate sarvapāpaiḥ ॥ 15 ॥
eṣo ha devaḥ pradiśo'nu sarvāḥ ।
pūrvo ha jātaḥ sa u garbhe antaḥ ।
sa eva jātaḥ sa janiṣyamāṇaḥ
pratyaṅ janāstiṣṭhati sarvatomukhaḥ ॥ 16 ॥
yo devo agnau yo'psu
yo viśvaṁ bhuvanamāviveśa ।
ya oṣadhīṣu yo vanaspatiṣu
tasmai devāya namo namaḥ ॥ 17 ॥
ya eko jālavānīśata īśanībhiḥ
sarvāṁllokānīśata īśanībhiḥ ।
ya evaika udbhave sambhave ca
ya etad viduramṛtāste bhavanti ॥ 1 ॥
eko hi rudro na dvitīyāya tasthu -
rya imāṁllokānīśata īśanībhiḥ ।
pratyaṅ janāstiṣṭhati sañcukocāntakāle
saṁsṛjya viśvā bhuvanāni gopāḥ ॥ 2 ॥
viśvataścakṣuruta viśvatomukho
viśvatobāhuruta viśvataspāt ।
saṁ bāhubhyāṁ dhamati sampatatrai -
rdyāvābhūmī janayan deva ekaḥ ॥ 3 ॥
yo devānāṁ prabhavaścodbhavaśca
viśvādhipo rudro maharṣiḥ ।
hiraṇyagarbhaṁ janayāmāsa pūrvaṁ
sa no buddhyā śubhayā saṁyunaktu ॥ 4 ॥
yā te rudra śivā tanūraghorā'pāpakāśinī ।
tayā nastanuvā śantamayā giriśantābhicākaśīhi ॥ 5 ॥
yābhiṣuṁ giriśanta haste bibharṣyastave ।
śivāṁ giritra tāṁ kuru mā hiṁsīḥ puruṣaṁ jagat ॥ 6 ॥
tataḥ paraṁ brahma paraṁ bṛhantaṁ
yathānikāyaṁ sarvabhūteṣu gūḍham ।
viśvasyaikaṁ pariveṣṭitāra -
mīśaṁ taṁ jñātvā'mṛtā bhavanti ॥ 7 ॥
vedāhametaṁ puruṣaṁ mahānta -
mādityavarṇaṁ tamasaḥ parastāt ।
tameva viditvātimṛtyumeti
nānyaḥ panthā vidyate'yanāya ॥ 8 ॥
yasmāt paraṁ nāparamasti kiñcidya -
smānnaṇīyo na jyāyo'sti kaścit ।
vṛkṣa iva stabdho divi tiṣṭhatyeka -
stenedaṁ pūrṇaṁ puruṣeṇa sarvam ॥ 9 ॥
tato yaduttaratataṁ tadarūpamanāmayam ।
ya etadviduramṛtāste bhavanti athetare duḥkhamevāpiyanti ॥ 10 ॥
sarvānana śirogrīvaḥ sarvabhūtaguhāśayaḥ ।
sarvavyāpī sa bhagavāṁstasmāt sarvagataḥ śivaḥ ॥ 11 ॥
mahān prabhurvai puruṣaḥ satvasyaiṣa pravartakaḥ ।
sunirmalāmimāṁ prāptimīśāno jyotiravyayaḥ ॥ 12 ॥
aṅguṣṭhamātraḥ puruṣo'ntarātmā
sadā janānāṁ hṛdaye sanniviṣṭaḥ ।
hṛdā manīṣā manasābhiklṛpto
ya etad viduramṛtāste bhavanti ॥ 13 ॥
sahasraśīrṣā puruṣaḥ sahasrākṣaḥ sahasrapāt ।
sa bhūmiṁ viśvato vṛtvā atyatiṣṭhaddaśāṅgulam ॥ 14 ॥
puruṣa evedaṅ sarvaṁ yad bhūtaṁ yacca bhavyam ।
utāmṛtatvasyeśāno yadannenātirohati ॥ 15 ॥
sarvataḥ pāṇipādaṁ tat sarvato'kṣiśiromukham ।
sarvataḥ śrutimalloke sarvamāvṛtya tiṣṭhati ॥ 16 ॥
sarvendriyaguṇābhāsaṁ sarvendriyavivarjitam ।
sarvasya prabhumīśānaṁ sarvasya śaraṇaṁ suhṛt ॥ 17 ॥
navadvāre pure dehī haṁso lelāyate bahiḥ ।
vaśī sarvasya lokasya sthāvarasya carasya ca ॥ 18 ॥
apāṇipādo javano grahītā
paśyatyacakṣuḥ sa śṛṇotyakarṇaḥ ।
sa vetti vedyaṁ na ca tasyāsti vettā
tamāhuragryaṁ puruṣaṁ mahāntam ॥ 19 ॥
aṇoraṇīyān mahato mahīyā -
nātmā guhāyāṁ nihito'sya jantoḥ ।
tamakratuḥ paśyati vītaśoko
dhātuḥ prasādānmahimānamīśam ॥ 20 ॥
vedāhametamajaraṁ purāṇaṁ
sarvātmānaṁ sarvagataṁ vibhutvāt ।
janmanirodhaṁ pravadanti yasya
brahmavādino hi pravadanti nityam ॥ 21 ॥
ya eko'varṇo bahudhā śaktiyogād
varaṇānanekān nihitārtho dadhāti ।
vicaiti cānte viśvamādau ca devaḥ
sa no buddhyā śubhayā saṁyunaktu ॥ 1 ॥
tadevāgnistadāditya -
stadvāyustadu candramāḥ ।
tadeva śukraṁ tad brahma
tadāpastat prajāpatiḥ ॥ 2 ॥
tvaṁ strī pumānasi
tvaṁ kumāra uta vā kumārī ।
tvaṁ jīrṇo daṇḍena vañcasi
tvaṁ jāto bhavasi viśvatomukhaḥ ॥ 3 ॥
nīlaḥ pataṅgo harito lohitākṣa -
staḍidgarbha ṛtavaḥ samudrāḥ ।
anādimat tvaṁ vibhutvena vartase
yato jātāni bhuvanāni viśvā ॥ 4 ॥
ajāmekāṁ lohitaśuklakṛṣṇāṁ
bahvīḥ prajāḥ sṛjamānāṁ sarūpāḥ ।
ajo hyeko juṣamāṇo'nuśete
jahātyenāṁ bhuktabhogāmajo'nyaḥ ॥ 5 ॥
dvā suparṇā sayujā sakhāyā
samānaṁ vṛkṣaṁ pariṣasvajāte ।
tayoranyaḥ pippalaṁ svādvattyana -
śnannanyo abhicākaśīti ॥ 6 ॥
samāne vṛkṣe puruṣo nimagno' -
nīśayā śocati muhyamānaḥ ।
juṣṭaṁ yadā paśyatyanyamīśamasya
mahimānamiti vītaśokaḥ ॥ 7 ॥
ṛco akṣare parame vyoman
yasmindevā adhi viśve niṣeduḥ ।
yastaṁ na veda kimṛcā kariṣyati
ya ittadvidusta ime samāsate ॥ 8 ॥
chandāṁsi yajñāḥ kratavo vratāni
bhūtaṁ bhavyaṁ yacca vedā vadanti ।
asmān māyī sṛjate viśvameta -
ttasmiṁścānyo māyayā sanniruddhaḥ ॥ 9 ॥
māyāṁ tu prakṛtiṁ vidyānmāyinaṁ ca maheśvaram ।
tasyavayavabhūtaistu vyāptaṁ sarvamidaṁ jagat ॥ 10 ॥
yo yoniṁ yonimadhitiṣṭhatyeko
yasminnida । m saṁ ca vicaiti sarvam ।
tamīśānaṁ varadaṁ devamīḍyaṁ
nicāyyemāṁ śāntimatyantameti ॥ 11 ॥
yo devānāṁ prabhavaścodbhavaśca
viśvādhipo rudro maharṣiḥ ।
hiraṇyagarbhaṁ paśyata jāyamānaṁ
sa no buddhyā śubhayā saṁyunaktu ॥ 12 ॥
yo devānāmadhipo
yasminllokā adhiśritāḥ ।
ya īśe asya dvipadaścatuṣpadaḥ
kasmai devāya haviṣā vidhema ॥ 13 ॥
sūkṣmātisūkṣmaṁ kalilasya madhye
viśvasya sraṣṭhāramanekarūpam ।
viśvasyaikaṁ pariveṣṭitāraṁ
jñātvā śivaṁ śāntimatyantameti ॥ 14 ॥
sa eva kāle bhuvanasya goptā
viśvādhipaḥ sarvabhūteṣu gūḍhaḥ ।
yasmin yuktā brahmarṣayo devatāśca
tamevaṁ jñātvā mṛtyupāśāṁśchinatti ॥ 15 ॥
ghṛtāt paraṁ maṇḍamivātisūkṣmaṁ
jñātvā śivaṁ sarvabhūteṣu gūḍham ।
viśvasyaikaṁ pariveṣṭitāraṁ
jñātvā devaṁ mucyate sarvapāśaiḥ ॥ 16 ॥
eṣa devo viśvakarmā mahātmā
sadā janānāṁ hṛdaye sanniviṣṭaḥ ।
hṛdā manīṣā manasābhiklṛpto
ya etad viduramṛtāste bhavanti ॥ 17 ॥
yadā'tamastānna divā na rātriḥ
na sannacāsacchiva eva kevalaḥ ।
tadakṣaraṁ tat saviturvareṇyaṁ
prajñā ca tasmāt prasṛtā purāṇī ॥ 18 ॥
nainamūrdhvaṁ na tiryañcaṁ
na madhye na parijagrabhat ।
na tasya pratimā asti
yasya nāma mahad yaśaḥ ॥ 19 ॥
na sandṛśe tiṣṭhati rūpamasya
na cakṣuṣā paśyati kaścanainam ।
hṛdā hṛdisthaṁ manasā ya ena -
mevaṁ viduramṛtāste bhavanti ॥ 20 ॥
ajāta ityevaṁ kaścidbhīruḥ prapadyate ।
rudra yatte dakṣiṇaṁ mukhaṁ tena māṁ pāhi nityam ॥ 21 ॥
mā nastoke tanaye mā na āyuṣi
mā no goṣu mā na aśveṣu rīriṣaḥ ।
vīrān mā no rudra bhāmito
vadhīrhaviṣmantaḥ sadāmit tvā havāmahe ॥ 22 ॥
dve akṣare brahmapare tvanante
vidyāvidye nihite yatra gūḍhe ।
kṣaraṁ tvavidyā hyamṛtaṁ tu vidyā
vidyāvidye īśate yastu so'nyaḥ ॥ 1 ॥
yo yoniṁ yonimadhitiṣṭhatyeko
viśvāni rūpāṇi yonīśca sarvāḥ ।
ṛṣiṁ prasūtaṁ kapilaṁ yastamagre
jñānairbibharti jāyamānaṁ ca paśyet ॥ 2 ॥
ekaika jālaṁ bahudhā vikurva -
nnasmin kṣetre saṁharatyeṣa devaḥ ।
bhūyaḥ sṛṣṭvā patayastatheśaḥ
sarvādhipatyaṁ kurute mahātmā ॥ 3 ॥
sarvā diśa ūrdhvamadhaśca tiryak
prakāśayan bhrājate yadvanaḍvān ।
evaṁ sa devo bhagavān vareṇyo
yonisvabhāvānadhitiṣṭhatyekaḥ ॥ 4 ॥
yacca svabhāvaṁ pacati viśvayoniḥ
pācyāṁśca sarvān pariṇāmayed yaḥ ।
sarvametad viśvamadhitiṣṭhatyeko
guṇāṁśca sarvān viniyojayed yaḥ ॥ 5 ॥
tad vedaguhyopaniṣatsu gūḍhaṁ
tad brahmā vedate brahmayonim ।
ye pūrvaṁ devā ṛṣayaśca tad vidu -
ste tanmayā amṛtā vai babhūvuḥ ॥ 6 ॥
guṇānvayo yaḥ phalakarmakartā
kṛtasya tasyaiva sa copabhoktā ।
sa viśvarūpastriguṇastrivartmā
prāṇādhipaḥ sañcarati svakarmabhiḥ ॥ 7 ॥
aṅguṣṭhamātro ravitulyarūpaḥ
saṅkalpāhaṅkārasamanvito yaḥ ।
buddherguṇenātmaguṇena caiva
ārāgramātro'pyaparo'pi dṛṣṭaḥ ॥ 8 ॥
bālāgraśatabhāgasya śatadhā kalpitasya ca ।
bhāgo jīvaḥ sa vijñeyaḥ sa cānantyāya kalpate ॥ 9 ॥
naiva strī na pumāneṣa na caivāyaṁ napuṁsakaḥ ।
yadyaccharīramādatte tene tene sa yujyate ॥ 10 ॥
saṅkalpanasparśanadṛṣṭimohai -
rgrāsāmbuvṛṣṭyātmavivṛddhijanma ।
karmānugānyanukrameṇa dehī
sthāneṣu rūpāṇyabhisamprapadyate ॥ 11 ॥
sthūlāni sūkṣmāṇi bahūni caiva
rūpāṇi dehī svaguṇairvṛṇoti ।
kriyāguṇairātmaguṇaiśca teṣāṁ
saṁyogaheturaparo'pi dṛṣṭaḥ ॥ 12 ॥
anādyanantaṁ kalilasya madhye
viśvasya sraṣṭhāramanekarūpam ।
viśvasyaikaṁ pariveṣṭitāraṁ
jñātvā devaṁ mucyate sarvapāśaiḥ ॥ 13 ॥
bhāvagrāhyamanīḍākhyaṁ bhāvābhāvakaraṁ śivam ।
kalāsargakaraṁ devaṁ ye viduste jahustanum ॥ 14 ॥
svabhāvameke kavayo vadanti
kālaṁ tathānye parimuhyamānāḥ ।
devasyaiṣa mahimā tu loke
yenedaṁ bhrāmyate brahmacakram ॥ 1 ॥
yenāvṛtaṁ nityamidaṁ hi sarvaṁ jñaḥ
kālakāro guṇī sarvavid yaḥ ।
teneśitaṁ karma vivartate ha
pṛthivyaptejonilakhāni cintyam ॥ 2 ॥
tatkarma kṛtvā vinivartya bhūya -
stattvasya tāvena sametya yogam ।
ekena dvābhyāṁ tribhiraṣṭabhirvā
kālena caivātmaguṇaiśca sūkṣmaiḥ ॥ 3 ॥
ārabhya karmāṇi guṇānvitāni
bhāvāṁśca sarvān viniyojayedyaḥ ।
teṣāmabhāve kṛtakarmanāśaḥ
karmakṣaye yāti sa tattvato'nyaḥ ॥ 4 ॥
ādiḥ sa saṁyoganimittahetuḥ
parastrikālādakalo'pi dṛṣṭaḥ ।
taṁ viśvarūpaṁ bhavabhūtamīḍyaṁ
devaṁ svacittasthamupāsya pūrvam ॥ 5 ॥
sa vṛkṣakālākṛtibhiḥ paro'nyo
yasmāt prapañcaḥ parivartate'yam ।
dharmāvahaṁ pāpanudaṁ bhageśaṁ
jñātvātmasthamamṛtaṁ viśvadhāma ॥ 6 ॥
tamīśvarāṇāṁ paramaṁ maheśvaraṁ
taṁ devatānāṁ paramaṁ ca daivatam ।
patiṁ patīnāṁ paramaṁ parastād -
vidāma devaṁ bhuvaneśamīḍyam ॥ 7 ॥
na tasya kāryaṁ karaṇaṁ ca vidyate
na tatsamaścābhyadhikaśca dṛśyate ।
parāsya śaktirvividhaiva śrūyate
svābhāvikī jñānabalakriyā ca ॥ 8 ॥
na tasya kaścit patirasti loke
na ceśitā naiva ca tasya liṅgam ।
sa kāraṇaṁ karaṇādhipādhipo
na cāsya kaścijjanitā na cādhipaḥ ॥ 9 ॥
yastantunābha iva tantubhiḥ pradhānajaiḥ svabhāvataḥ ।
deva ekaḥ svamāvṛṇoti sa no dadhātu brahmāpyayam ॥ 10 ॥
eko devaḥ sarvabhūteṣu gūḍhaḥ
sarvavyāpī sarvabhūtāntarātmā ।
karmādhyakṣaḥ sarvabhūtādhivāsaḥ
sākṣī cetā kevalo nirguṇaśca ॥ 11 ॥
eko vaśī niṣkriyāṇāṁ bahūnā -
mekaṁ bījaṁ bahudhā yaḥ karoti ।
tamātmasthaṁ ye'nupaśyanti dhīrā -
steṣāṁ sukhaṁ śāśvataṁ netareṣām ॥ 12 ॥
nityo nityānāṁ cetanaścetanānā -
meko bahūnāṁ yo vidadhāti kāmān ।
tatkāraṇaṁ sāṅkhyayogādhigamyaṁ
jñātvā devaṁ mucyate sarvapāśaiḥ ॥ 13 ॥
na tatra sūryo bhāti na candratārakaṁ
nemā vidyuto bhānti kuto'yamagniḥ ।
tameva bhāntamanubhāti sarvaṁ
tasya bhāsā sarvamidaṁ vibhāti ॥ 14 ॥
eko haṁsaḥ bhuvanasyāsya madhye
sa evāgniḥ salile saṁniviṣṭaḥ ।
tameva viditvā atimṛtyumeti
nānyaḥ panthā vidyate'yanāya ॥ 15 ॥
sa viśvakṛd viśvavidātmayoni -
rjñaḥ kālakālo guṇī sarvavid yaḥ ।
pradhānakṣetrajñapatirguṇeśaḥ
saṁsāramokṣasthitibandhahetuḥ ॥ 16 ॥
sa tanmayo hyamṛta īśasaṁstho
jñaḥ sarvago bhuvanasyāsya goptā ।
ya īśe'sya jagato nityameva
nānyo heturvidyata īśanāya ॥ 17 ॥
yo brahmāṇaṁ vidadhāti pūrvaṁ
yo vai vedāṁśca prahiṇoti tasmai ।
taṁ ha devaṁ ātmabuddhiprakāśaṁ
mumukṣurvai śaraṇamahaṁ prapadye ॥ 18 ॥
niṣkalaṁ niṣkriyaṁ śāntaṁ niravadyaṁ nirañjanam ।
amṛtasya paraṁ setuṁ dagdhendanamivānalam ॥ 19 ॥
yadā carmavadākāśaṁ veṣṭayiṣyanti mānavāḥ ।
tadā devamavijñāya duḥkhasyānto bhaviṣyati ॥ 20 ॥
tapaḥprabhāvād devaprasādācca
brahma ha śvetāśvataro'tha vidvān ।
atyāśramibhyaḥ paramaṁ pavitraṁ
provāca samyagṛṣisaṅghajuṣṭam ॥ 21 ॥
vedānte paramaṁ guhyaṁ purākalpe pracoditam ।
nāpraśāntāya dātavyaṁ nāputrāyāśiṣyāya vā punaḥ ॥ 22 ॥
yasya deve parā bhaktiḥ yathā deve tathā gurau ।
tasyaite kathitā hyarthāḥ prakāśante mahātmanaḥ ॥ 23 ॥
prakāśante mahātmana iti ।