īśāvāsyopaniṣat

īśā vāsyamidaṁ sarvaṁ yatkiṁ ca jagatyāṁ jagat ।
tena tyaktena bhuñjīthā mā gṛdhaḥ kasya sviddhanam ॥ 1 ॥

kurvanneveha karmāṇi jijīviṣecchataṁ samāḥ ।
evaṁ tvayi nānyatheto'sti na karma lipyate nare ॥ 2 ॥

asuryā nāma te lokā andhena tamasā vṛtāḥ ।
tāṁste pretyābhigacchanti ye ke cātmahano janāḥ ॥ 3 ॥

anejadekaṁ manaso javīyo nainaddevā āpnuvanpūrvamarṣat ।
taddhāvato'nyānatyeti tiṣṭha—ttasminnapo mātariśvā dadhāti ॥ 4 ॥

tadejati tannaijati taddūre tadvantike ।
tadantarasya sarvasya tadu sarvasyāsya bāhyataḥ ॥ 5 ॥

yastu sarvāṇi bhūtāni ātmanyevānupaśyati ।
sarvabhūteṣu cātmānaṁ tato na vijugupsate ॥ 6 ॥

yasminsarvāṇi bhūtāni ātmaivābhūdvijānataḥ ।
tatra ko mohaḥ kaḥ śoka ekatvamanupaśyataḥ ॥ 7 ॥

sa paryagācchukramakāyamavraṇa—masnāviraṁ śuddhamapāpaviddham ।
kavirmanīṣī paribhūḥ svayambhūryāthātathyato—'rthānvyadadhācchāśvatībhyaḥ samābhyaḥ ॥ 8 ॥

andhaṁ tamaḥ praviśanti ye avidyāmupāsate ।
tato bhūya iva te tamo ya u vidyāyāṁ ratāḥ ॥ 9 ॥

anyadevāhurvidyayā anyadāhuravidyayā ।
iti śuśruma dhīrāṇāṁ ye nastadvicacakṣire ॥ 10 ॥

vidyāṁ cāvidyāṁ ca yastadvedobhayaṁ saha ।
avidyayā mṛtyuṁ tīrtvā vidyayāmṛtamaśnute ॥ 11 ॥

andhaṁ tamaḥ praviśanti ye'sambhūtimupāsate ।
tato bhūya iva te tamo ya u sambhūtyāṁ ratāḥ ॥ 12 ॥

anyadevāhuḥ sambhavādanyadāhurasambhavāt ।
iti śuśruma dhīrāṇāṁ ye nastadvicacakṣire ॥ 13 ॥

sambhūtiṁ ca vināśaṁ ca yastadvedobhayaṁ saha ।
vināśena mṛtyuṁ tīrtvā sambhūtyāmṛtamaśnute ॥ 14 ॥

hiraṇmayena pātreṇa satyasyāpihitaṁ mukham ।
tattvaṁ pūṣannapāvṛṇu satyadharmāya dṛṣṭaye ॥ 15 ॥

pūṣannekarṣe yama sūrya prājāpatya vyūha
raśmīnsamūha tejo yatte rūpaṁ kalyāṇatamaṁ
tatte paśyāmi yo'sāvasau puruṣaḥ so'hamasmi ॥ 16 ॥

vāyuranilamamṛtamathedaṁ bhasmāntaṁ śarīram ।
oṁ krato smara kṛtaṁ smara krato smara kṛtaṁ smara ॥ 17 ॥

agne naya supathā rāye asmānviśvāni deva vayunāni vidvān ।
yuyodhyasmajjuhurāṇameno bhūyiṣṭhāṁ te namauktiṁ vidhema ॥ 18 ॥